Kreasi Anak Bangsa

Ngawiti ingsun nglaras Syi'iran
kelawan muji maring Pangeran
kang paring rohmat lan kenikmatan
rino wengine tanpo pitungan

duh bolo konco priyo wanito
ojo mung ngaji syare'at bloko
gur pinter ndongeng, nulis, lan moco
tembe mburine bakal sangsoro

akeh kang apal Qur'an hadits-e
seneng ngafirke marang liyane
kafire dewe gak digatekke
yen isih kotor ati akale

gampang kabujuk nafsu angkoro
ing pepaese gebyare ndunyo
iri lan meri sugihe tonggo
mulo atine peteng lan nisto

ayo sedulur jo nglaleake
wajibe ngaji sak pranatane
nggo ngandelake iman tauhide
baguse sangu mulyo matine

kang aran soleh bagus atine
kerono mapan seri ngelmune
laku thoreqot lan ma'rifate
ugo hakikot manjing rasane

Al Qur'an Qodim wahyu minulyo
tanpo ditulis biso diwoco
iku wejangan guru waskito
den tancepake ing njero dodo

kumantil ati lan pikiran
ngrasuk ing badan kabeh jeroan
mukjizat Rosul dadi pedoman
minongko dalan manjinge iman

kelawan Allah kang Moho Suci
kudu rangkulan rino lan wengi
ditirakati diriyadhohi
dzikir lan suluk jo nganti lali

uripe ayem rumongso aman
dununge roso tondo yen iman
sabar narimo najan pas-pasan
kabeh tinakdir saking Pangeran

kelawan konco dulur lan tonggo
kang podo rukun ojo ngasio
iku sunahe Rosul kang mulyo
Nabi Muhammad panutan kito

ayo nglakoni sekabehane
Allah kang bakal ngangkat drajate
sanajan asor toto dhohire
ananging mulyo maqom drajate

lamun palastro ing pungkasane
ora kesasar roh lan sukmane
den gadang Alloh swargo manggone
utuh mayite ugo ulese
utuh mayite ugo ulese

written by Al-maghfuroh KH Abdurrahman Wahid a.k.a Gus Dur

Mari kita kontemplasikan serta amalkan bersama-sama, Saudaraku. Semoga hidup kita bermanfaat bagi sesama dan meninggal dengan husnul khotimah. :)

sumber :http://www.facebook.com/notes/muhaiminati-fahmi-nur/syiir-tanpo-waton-by-kh-abdurrahman-wahid-aka-gus-dur/10150268186185044